مرجوحة جريئة

يلتسألين أعلة حالي لا تخافين الحزن عندي جبير

الدمع خير

الروج يعلة وأبد ما أغركَـ لأن شابع دمع

وحلمي يطفو من يمر السيل سكتة

الساعة خرسة

والشوارع تستحي من الخوف تطفة

ويشتعل بية الحنين

وحتى يكَضي العمر أبقى أحركَـ سنين

السجة ما تخلص ولا عندي محطة

ومثلي تايه حيل يشبهني الدرب

وعايش بأصعب تناقض

صادق بكل جرح عندي وأضحك هواية جذب

أحب وأتعب وأشتعل واطفة واحب

يذبل بصدري ورد اسود يدور ماي والملكَة شحيح

وبالدموع أغسل شبابيجي واتاني الصبح بلكي الليل يخلص وأستريح
العلاقة العندي ويّ الليل مبنية بجرح
محزّم بجفني صواني سهر خطواته ملح

نّمارس الضحكة بشراهة موت بين الناس نغركَـ

ويّ جاري الماي يومية نبدل وجوه خاف الجوع يعتكَـ

يلتسألين أعلة حالي

شوفي ذاكرتي القديمة

صفت مليانة تجاعيد وبقاية احلامنا

السراب هواي تعبنا نسولفله عطشنا والنهر كَدامنا

وأحنة محتاجين مرجوحة جريئة

تهز عواطفنا وتلولي أجسامنا

أحنة محتاجين بير

نّضم سوالفنا وبقايا اسرارنا الما بيها رجفة مستحانه

جناح أشد روحي إعلة حلمج بلكي ياخذني ويطير

يلتسألين إعلة حالي

شرد أسولفلج فشلتي

من يسألوني أبرود أعصاب ولفك وينه

لو جرح كَلبي النزف من عينة سرب طيور مشتاكَة لخيالج وشيصبر عينه

الريح تاخذني بعيد شراع وترجعني ثوب أبيض وأزف كَلبج بدية
بلكي وي غيري تطشيني أعلة باقي أسنينه

محمل بغصني وركَـ يبجي انتظار

وريحة أحلامج بعدها تفوح بية
مدثر بذاكرتي جم صورة وطعم آخر نهار

أجدامي عطشانة سفر والخطوة ظلمة

والمسافة البينا بكَد ما افكر بيها وألهث خضر براسي قطار

وروحي ضاعت سجة بسنون القطار
آآآه... بسنون القطار