السبت، 10 سبتمبر 2011

أنسان !!!!!!!!!!!!!!!!!!!!!!!!!!!! كامل



تاهت بروحي سفينة

وعش عصافير أعلة شباك الكَلب فز محتركَـ 
أمشي وسوالفنة تاخذني اعلة روحي

بريحة ثيابي أدورك
 وصرت بجدامي أعلة طاريك أنسحكَـ
مغمض عيوني وشوفك
أفتح عيوني أختنكَـ
أزرع الصفنة جرح بالبال تكبر تمطر السكتة عشكَـ
تهيج بصدري جكاير دخنتها بليل فركَة
غيوم أشهكَـ
روحي تزهكَـ
أكَلب عيوني وبدي دموعي بالشارع وأحركَة 
باوع لكَلبي خطية 
عصرة جفوف الوداع لهسة أثرها خطوط زركَة
أحبيبي وينة؟؟؟
هالسؤال اليركض براسي مسافات وشوارع خالية من العشكَـ ذاك الجان بينة
نكَطت عيني نظرهة أعلة الدرب شمعة حزينة
بكثر ما أسأل وجوه الناس عنك زهكَت روح المدينة 
أحبيبي وينة؟؟ 
أحبيبي وينة؟؟
 جروحي تصرخ وين لجماتة الحنينة



أنت كَلبي 

طيور كل الدنيا تلتم أعلة صدري تريد تسمع صوتك
دموعي زفة مستحة بلذة عذابك
لحكَـ بسرعة قبل لتفوتك
تريدني أتمشة على أفكارك سوالف؟؟
وأني لبعقلي ملايين الغرف
أفتح البيبان أدورك 
 وطلع صوتك حزن من أذني نزف
باب أفتحة وصورتك تطلع علية
باب أفتحة من المشاعر تنكَلب دنياي بية
وباب أفتحة وتطش ذكرى جروحنة بوجه المكابر واهلية
أنت أول جذبة بيها هواي من عندي حقيقي
وأنت أول غلطة جلب بيها جدمي وخضرت شجرة بطريقي
وأنت أول شخص سفطلي النجوم أباب بيتي وخلة المسامر صديقي
 وأني أول شخص جلب بالسراب وشرب منة
وأني أول شخص طب للنار 
ببرودة أعصابة أيطفي بيها ومقتنع بالنار جنة
وأني أول شخص ماخذ دور بيت
ساكنة بروحي المواجع ليل وبحزني طفيت
جربت كلشي بحياتي
الحزن بأنواعة الجروح بكل الأحجام وأخيراً جربت طعم الغدر فرحان أجيت
هسة صرت أنسان كامل
شايل بروحي ورد لونة قديم معطر بريحة رسايل
أنكتبت بجف عاشكَـ أخرس
حاول يطلع مشاعر كَلبة طكَـ جفنة سنابل
هسة صرت أنسان كامل
عمري وجهة أصفر يلبطبعك خريف
وشجرة عطشانة بلابل
هسة صرت أنسان كامل
أزرع بدربي محطات بكثر شوكَي عليك
وأحفر بكَلبي أثر خنجر ضكَت طعمة بديك
وأحبس بصدري صدى صوتي أنتفاضة وشعب رايد يبحر بدمة ويجيك
وما يجيك 
وما يجيك
وما يجيك

هناك تعليقان (2):

  1. راائع انت عزيزى موءيد ..احب الشعر الشعبى جدا احس انه يعزف ناى حزين على وتر المشاعر ..اتمنى ان اقرا لك دائما ...انت مبدع ..زهره التوليب

    ردحذف
  2. شكراً لعطركِ ألذي أضاف الرونق لقصائدي وأتمنى أن أرى مروركِ الدائم يفوح بقناديل تضيء حروفي

    ردحذف