الأربعاء، 23 نوفمبر، 2011

بقايا الحب والذكريات...... واحد عشرة



وهمٌ أكبر من مخيلتي..... سأعيشهُ ذكرى






واحد عشرة
شفت الكون بصفنة عيني
الكون بكبرة
وشفت سوالف روحي الطفلة..... بحبج طفلة
تلاعب رمش الدنيا بضحكة شوكَـ ونظرة
بواحد عشرة
طلعت اطفال ألي بصدري
يطشون ورود وفرّاش بروحي الخضرة
أزرع عيد بكَاع أحساسي
تخضر مرجوحة صغيرونة
أسكَيها أطفال وضحكات بعين الفقرة
بواحد عشرة
تعلمت أعشكَـ كل الناس بحبج أنتِ
وشفت الناس تغني وتركَص كلها براسي بلوحة فكرة
تعلمت احجي
تعلمت أبجي
تعلمت أمشي بدرب العِشرة
تعلمت أجمع كل دمعة المرت بسنيني
حلمين وطارن من عيني...... عصفورين
كتبن شوكَـ الدنيا بشفتي
وشفتج تقرة
.........
بواحد عشرة
بطبشور وقسمت الدنيا
هذا لكَلبي
ذاك لكَلبج
هاي نجوم أنطشها بشعرج
هاي غيوم وأعصرهن بعيونج كَطرة
هاي الغابة نسيجها بفرحتنا حديقة
ذيج الدنيا الجذابة نحولها حقيقة
ونشعل شميستنا شموع بليلة سهرة
ذاك البحر نغسل بي وجه الصبحية
ونضفر سعف النخلة كَصايب
ونمشط فّي لكل شجرة
نلون وجه الكون طيور
نشد ترجية لكل عصفور
يهز ترجيته براسه يغني وصوته يسكره
بواحد عشرة
أجمع أيام الأسبوع
وأشعلهن صينية شموع
وامشي بكل شارع بسنينج وأشعل ذكرى
وأرسم جنة
وشجرة تفاح صغيرونة
و"آدم" بس مشدودة جفوفة وأمسح من اللوحة جنونه
وأرسم "حواء" بلهفتها....... تسمع فيروز وتنتظره
يا عيدي وميلادي الثاني
يا فرحي وجنة أحزاني
يا موعد شوكَـ وأنتظره
بواحد عشرة

الأربعاء، 2 نوفمبر، 2011

واهس الفقرة





مرة أجانة الفرح بس لفة الردى
مرة من جانت طفولة كَلبي تلعب بالندى
مرة من جنة صغار
كَبل من جانت دعابل شوكَنة أطشهة الشوارع نجم بحظان النهار
وي الشمس ختيلة نلعب
تشوفني وتركض علية وتزرع البوسة أعلة وجناتي سمار

وجنت أغار
من النجوم هواي أغار
من الطيور هواي أغار

أتمنى أطير
أتمنى ألف روحي أعلة غيمة
وتمطر عيوني فرح للناس خير 

صغير أني جنت بس كَلبي جبير...... شكَد جبير
كَلبي طيارة ورق خذها الهوة وخيطي حرير

كَلبي يركَص 
ويّ كل نسمة ربيع تمر حنين
وكَلبي يلعب
ويّ كل لمضة شرارة غيرة مشتعلة بحلكَـ تنور طين
مرة أجانة الفرح بس جانة حزين!!!
ضحكته بلون الصحاري
ودمعة الفرحة يغلفها بسواد

تصور بكَد ما غمرني
بضحكة عيوني الدمع ضعفين زاد
أحسب شكم ضحكة غنيناهة سكتة
وأحسب شكم "حصوة" بالشارع لكَيناهة محنة وقبلتها أجدامنة
الحزن جداً سريع
شكَد لعبنة
شكَد ركضنة 

بكل درابين المحلة 
بلا مبالاة بحجم حيل الطفولة وهم طلع كَدامنة
ها يكَلبي
طشرت حلمك ذبل لون الليالي؟

حط أديك أبين أدين
نصعد لوجه السمة نزرع شمس

الحزن صعبة يموت الموت للناس التحس
وأرد أعيش
شوية أعيش شوية وأتنفس حياة

الوكت ما تخلص صفنته
الوكت لو طالت صفنته نكَول مات 

الوكت يمشي أعلة كَاع سنيني يزرع ذكريات
ودغدغت جرحي وضحك ضحكة سكارى
مسودنين هواي بس عدهم ضمير
ومو شرط بجيوبنا نزين فرحنا
واهس الفُقرة حلو بخبزة شعير
صغير اني جنت بس كلش فقير
صغير اني جنت.....  بس كَلبي جبير

الاثنين، 10 أكتوبر، 2011

وينك أنتَ ؟؟؟





وينك أنتَ
أنت يا صوت المحبة الغاب من سنيني سكتة
وينك أنتَ
وجهك المعكوس فوكَـ الماي ببحور المحبة
أطركَـ بموج الفراكَـ وما عرفتة
وينك أنتَ
كَلبي يصرخ
روحي ترجف
مثل ليل بلايه سهرة
ريح بين أغصان شجرة
هموم تعزف
وينك أنتَ
الصوت ما يعبر حّدود شفافي بس بحلكَي صاح 
 ورد عليّ الصدى راح
يكَلي راح
ورد عليّ كَلبي بفشلتة مغطي وجهه
مسوي دمعاتة وشاح
ورد عليّ الليل جن غيمة جبيرة
تغطي شمس الله الجبيرة
وعلى رازونة فجرنة
الجفن مد أيدة يطلب خيط من نور الصباح
وردْ علية
وردْ علية
وردْ علية
وأنتَ مارديت ليش
وأنتَ تعرفني سنابل من يمر وكت الحصاد شلون أعيش
شلون أعيش
وأنة من أعشكَـ أعيش
وأحنة هسة بوكت صار الموت يمشي بكل رهاوة
ويدري بالوادم حطب وسنونة نار
الدنيا مو جي تبتسم معناها حلوة
الشوك هم مثل الوركَـ يحمل خظار
وانة أريد أعشكَـ وحّب
ودورت عن حب قديم وهاي صار سنين أدور
ضايع بحضن الدرب
ومن كثر ركض المشاعر يلهث لسان الكَلب
وصابرين
وصابرين
والصبر صاير ملح ونرش على جروح السنين
وبالجذب للناس أضحك
وأضحك وصوت الضحك يطلع حزين
وصابرين
والفقر شد راية سودة هناك فوكَـ سطوح أهلنة
وحنة كَد مافقرة صدكَـ
فوكَـ ماضينة عتكَنة
بس أكابر
وبقة صابر
ويبقة بزنودي الصبر يكَدر يشيل هموم باجر
ويبقة بضلوعي الحزن مرتاح يضحك
مثل دمعات الشهيد أطيح تظحك ع السواتر
الصوت بعدة يوزع الجلمات جن تسمع هلال
طير محبوس بسجن
الذكرى صارت تحفة منسية قديمة معلكَة برف الزمن
الروح شجرة
يضل جذرها يوصللها أجمل حياة وهوة بالكَاع أندفن
والدمع يرسم على خدودي أبتسامة
وبيها يتحدى الحزن
وبيها يتحدى 
ا
ل
ح
ز
ن

غنوة خرسة




مو لأن أنت جميل أنا أحبك
هيّ مو قصة جَمال
بس عرفت الشوك دمعة وغنوة خرسة ولوحة مرسومة علة جدران الخيال
وشفت كل الفرحة بيدك وأعرف بحبك محال
وتدري طعم الليل صاير شعر ممزوج بأرق
وآخ ياحمل القصيدة يتعب أمتون الورق
وأني غيمة وخايف أتفتت وضيع
أشكَد خطية الغيم يمطر

 شتة يصبر
 وتالي يطشر يموت يذوب بشفاف الربيع
وأنا أحبك
وأبقى أحبك
وأبقى زعلان أعلة عقلي الما فهم أسرار حبك
وأبقى ما أحجي ويّ جدمي
لأن شفتة بلا قصد مرة عثر هوّ علة دربك
ذاك دربك
من شليل العمر فوكَة أطشرت كومة سنين
والعشكَـ مثل الطيور أيروح ويردة الحنين
أيرد حزين
شايل بجفة سوالف كَاعنة الطينتهة سمرة
ومن بعيد بوسط كَلبة أمبينة ذيج النار حمرة
الناس من تموت تترك فوكَـ ماضيهة أثر
وأنت يل حبك كتلني وبقت أثاري شعر
ومتت سكتة بلا خبر
أشكَد غشيمة الروح كَطرة ماي هية وركَضت لحضن النهر
وجنت أضنك بلبل بعمري يغني
وجنت أضنك طفل مفطوم أعلة دمع عيوني ذني
وخاب ظني
وأنت صرت أبعيد عني
بعيـــــــــــــــــــــــــــــــد عني
هناك أنت بوسط كَلبي بعيد عني
لأن كَلبي وياك راح
وجفني صاح أجفوف دمعاتي لّوني
أجفوف 

دمعاتي 
لّوني

أجمل طعم للآه







كون بشوكي أكَلك هاك
شوف أسوة بيه هواك
خلاني أبحر حبك سفينة ولطم وجهي الموج ويمتة يحن كَلب مرساك؟؟
ويمر بيه الحزن سعفة وتمرهة الريح وأظل أرجف حزن بس ما أكول أنساك
يا أجمل طعم للآه
بس أنت من أكَول الآه بأسمك تطفة نيراني
ويا شجرة مشاعر بيها مية لون أريد أكعد بفيك وأنسة أحزاني
ونرد أحباب
أي والله نرد أحباب
يانسمة بحلم وأنا أدري ميصدكون أبرد جسمي يرجف لو تمرني بآب
وأنة جرحي طفل مرني بتولي الليل دك الباب
أختلط صوتة وي دمعة وصاحلي بابا
أجة بجف ايدة لعابة
عليهة آثار دوسة ألف دبابة
أبوذية كتب خطهة علة صدر الغيم من كثر العتاب أنكَلبت أعتابة
لومي بكلبي يا دنية وعتبي
تركني وكلبي يرجعلة وعت بي
أبوذية أكتب بحزني وعتبي
وعتابة تنكلب من كثر العتاب

ونرد أحباب
أي والله نرد أحباب
نرد نمشي علة درب الجان يحضنة بواجينة
ويصعد حبي غيمة تغطي شمس الموت خافنهة تجوينة
وشوف بوجهك أنت الكون وبكل عين سبع بحور
يلفايض عشك مرني أعلة كَاعي البور
وبرمشك شفت غابات على كل شجرة ألف عصفور
تحط...............وطير

تلف ............. وتدور
عصافيرك مشاعر ما تعرف الزوّر
تاخذني بحلم وردي وترد بيه أعلة "دار ودور"
ونرد أصغار
أي والله نرد أصغار
نروح المدرسة بضحكة 

ونرد لبيوتنة بضحكة
وحتى الورد منة يغار
وكَبل لانفتركَـ كلمن يروح البيت بدموعك تخطلي بجفني كلمة دار
وأفز من الحلم وحتار
وسد عيني وألملم من وشال الحلم جم تذكار
ولكَاهة بعدهة بجفني كلمة دار!!
ومن شوكَي ولهفتي أقراهة بالمكَلوب تطلع راد
وبلكَت راد

بلكت عمري كلة بشوفتك ينعاد
وأحط روحي أنا سجة بدرب المواعيد بلكي يمر قطار الحمل بفركَاك
وأربط نبض كَلبي بصوت دكت الباب لمن تدك بابي الكَلب يصرخ جاك
وصدكَـ نرجع بعد نتلاكَة أنا وياك
وأكَلك هاك
شوف أسوة بيه هواك

شرد أعوف؟؟؟؟





شرد أعوف.....؟
وكَبل عفت اعيوني مشدودة بخيالك ..! حتى بس شخصك تشوف
وشرد أعوف.....؟
وكَبل عفت أشفافي ترجية بذانك حتى تقرالك تراتيل العشكَـ ساعة الخوف
وشرد أعوف
وكَبل عفت الجسد مرمي وطيرت روحي فراشة بحضرة اخدودك تطوف
وأنا بعدك كَمر ما يحجي وي شمسه هي ما تنطي ضواهة
وهو مشاهة خسوف
ورحي بعدك وردة مزروعة علة تلة
والنهر يبعد عليهة وتدعي ماينزل مطر
وعاشت بأحلى براءة
وماتت بنفس البراءة
ومطرت الدنية وحسافة الوردة ماتت من شهر
وكَلبي شتلت شوكَـ مزروعة بسنادين الصبر
وأنا صاير جن جسر محني أعلة روحة عبر الناس أعلة ظهره وما عبر!!
وآخ لو أموّتن مثل دمعة أعلة خدك
وأنت تمسحني بمناديل الوداع ومني ما يبقة أثر
وصغت دمعاتي أعلة وجناتي نجوم وصرت أنا الليل من كثر السهر
ويا كَمر
رد أنا ليلك ياكَمر
يا كَمر
وحشة بَلياك العمر
وجيتك أنا أبجي برعونة طفل تايه ضيع أمه
وحرت جن حيرت رماد وطار وي ريح المنايا ورايد أجفوف التلمه
وأنا ناعور أصبحت والحزن ماي
أشما أحاول أبتعد عن الحزن أفتر عكس الكَاه وراي
وذيج أديك البيهن أدفة
وهاي أدية البيها تغفة
أشوكت يجمعنة زماني و تجتمع ذيج وي هاي؟؟
وشوف
حال جروحي لو رايد تشوف
وشوف
حال الشعر من تبجي الحروف!
وشوف كَلبي بكل صلافة شال حمل الدنية كله وهو مايملك جفوف
وشرد أعوف؟؟
وأنا كل عمري قصيدة بأسمك وبيهة زحوف

السبت، 10 سبتمبر، 2011

الحقيقة


تذكرتها
وليل بعيوني ومشاوير وسوالف دافية
تذكرتها.... ولفلفت جرحي بجريدة
وشلته بيدي من الصبح وتوجهت للعافية
جان بية الشوكَـ لعب أطفال طلعوا للشوارع
لبسوا الكَاع برجلهم حتى يقتنعون لا مو حافية
شاورت كل الحياطين وحفظت أسراري يمها
عيون ما تعرف حجي
جن شمس تبجي على الكَاع بضواهة
الناس تتبلل محنة
وغيرت بيها قوانين البجي
تذكرتها
ورجع بية الخوف ريح ومطر وشبابيج مفتوحة وصلاة بلاية دين
وشكَكَت روحي بصلافة شوكَـ ناس مسودنين
أعبر الصفنة بقصيدة نار تنزف من جرحها الغافي طين
تذكرتها وناقشت روحي على أسوالفها كلها
شبعد وشّتذكرين؟؟
ودمعت روحي وبديها أوراق صفرة
بلون وجهي قبل لا أموت بدقيقة
وماتت وياي ودفنت المطر بعيوني
وشربت الجذب حتى أعرف طريقة
والحقيقة
جيب جم جذبة وخيال
ورب قديم
وحاجة من السوكَـ تنباع أبلاش
ودمع بايت
خيط وأربطهن سوة يطلعن حقيقة
يا حقيقة؟؟
وأني لملمت الجرف يم حلكَي حتى أشرب طلع مايه رحيل
وسافرت وي النهر عطشان ألم صبري ومواويلي عويل
تلفتت خايف ادور بالسمة شباك حتى اعبر الليل
تذكرتها
تذكرت من سدت الباب وبقيت أني وعشكَـ تعبان بس بلا ملامح
ومن مشاعرنا الثلج غطة الشمس واحنة أنطفينة
وجوه عريانة ونلم الغيم وانغطي خجلنة
وأيد مدت راسها تباوع علينا
شكَد بجينة
صح بجينة بلا دمع لكن بجينة
بكثر ما بية حزن وبكَلبي خوف
بكثر ما طعم الكلام بعقلي عودته على الآهات وبكل حرف أوف
بكثر ما تعبان من واقع سخيف
ومفردات بلاية معنى وجنت أسميها ضروف
بكثر مابية حنين وشوكَـ يغفة بين جلامتي وطن
حتى ترحالي أبطلة
أجدام ذاكرتي نست طعم الزمن
تذكرتها
تذكرت خطواتي من جانن صغار وضيعتها وياهة
تذكرت من جنت ما أعرف الشوكَـ وحرت لو أهواها لو أهواها
تذكرت كلمة "أحبك"
وأني حافظها صحيح بكَلبي لكن ضيعت معناهة
تذكرتها
تذكرت أنساهة
تذكرت أنساهة..

أنسان !!!!!!!!!!!!!!!!!!!!!!!!!!!! كامل



تاهت بروحي سفينة

وعش عصافير أعلة شباك الكَلب فز محتركَـ 
أمشي وسوالفنة تاخذني اعلة روحي

بريحة ثيابي أدورك
 وصرت بجدامي أعلة طاريك أنسحكَـ
مغمض عيوني وشوفك
أفتح عيوني أختنكَـ
أزرع الصفنة جرح بالبال تكبر تمطر السكتة عشكَـ
تهيج بصدري جكاير دخنتها بليل فركَة
غيوم أشهكَـ
روحي تزهكَـ
أكَلب عيوني وبدي دموعي بالشارع وأحركَة 
باوع لكَلبي خطية 
عصرة جفوف الوداع لهسة أثرها خطوط زركَة
أحبيبي وينة؟؟؟
هالسؤال اليركض براسي مسافات وشوارع خالية من العشكَـ ذاك الجان بينة
نكَطت عيني نظرهة أعلة الدرب شمعة حزينة
بكثر ما أسأل وجوه الناس عنك زهكَت روح المدينة 
أحبيبي وينة؟؟ 
أحبيبي وينة؟؟
 جروحي تصرخ وين لجماتة الحنينة



أنت كَلبي 

طيور كل الدنيا تلتم أعلة صدري تريد تسمع صوتك
دموعي زفة مستحة بلذة عذابك
لحكَـ بسرعة قبل لتفوتك
تريدني أتمشة على أفكارك سوالف؟؟
وأني لبعقلي ملايين الغرف
أفتح البيبان أدورك 
 وطلع صوتك حزن من أذني نزف
باب أفتحة وصورتك تطلع علية
باب أفتحة من المشاعر تنكَلب دنياي بية
وباب أفتحة وتطش ذكرى جروحنة بوجه المكابر واهلية
أنت أول جذبة بيها هواي من عندي حقيقي
وأنت أول غلطة جلب بيها جدمي وخضرت شجرة بطريقي
وأنت أول شخص سفطلي النجوم أباب بيتي وخلة المسامر صديقي
 وأني أول شخص جلب بالسراب وشرب منة
وأني أول شخص طب للنار 
ببرودة أعصابة أيطفي بيها ومقتنع بالنار جنة
وأني أول شخص ماخذ دور بيت
ساكنة بروحي المواجع ليل وبحزني طفيت
جربت كلشي بحياتي
الحزن بأنواعة الجروح بكل الأحجام وأخيراً جربت طعم الغدر فرحان أجيت
هسة صرت أنسان كامل
شايل بروحي ورد لونة قديم معطر بريحة رسايل
أنكتبت بجف عاشكَـ أخرس
حاول يطلع مشاعر كَلبة طكَـ جفنة سنابل
هسة صرت أنسان كامل
عمري وجهة أصفر يلبطبعك خريف
وشجرة عطشانة بلابل
هسة صرت أنسان كامل
أزرع بدربي محطات بكثر شوكَي عليك
وأحفر بكَلبي أثر خنجر ضكَت طعمة بديك
وأحبس بصدري صدى صوتي أنتفاضة وشعب رايد يبحر بدمة ويجيك
وما يجيك 
وما يجيك
وما يجيك