مرة أجانة الفرح بس لفة الردى
مرة من جانت طفولة كَلبي تلعب بالندى
مرة من جنة صغار
كَبل من جانت دعابل شوكَنة أطشهة الشوارع نجم بحظان النهار
وي الشمس ختيلة نلعب
تشوفني وتركض علية وتزرع البوسة أعلة وجناتي سمار
وجنت أغار
من النجوم هواي أغار
من الطيور هواي أغار
أتمنى أطير
أتمنى ألف روحي أعلة غيمة
وتمطر عيوني فرح للناس خير
صغير أني جنت بس كَلبي جبير...... شكَد جبير
كَلبي طيارة ورق خذها الهوة وخيطي حرير
كَلبي يركَص
ويّ كل نسمة ربيع تمر حنين
وكَلبي يلعب
ويّ كل لمضة شرارة غيرة مشتعلة بحلكَـ تنور طين
مرة أجانة الفرح بس جانة حزين!!!
ضحكته بلون الصحاري
ودمعة الفرحة يغلفها بسواد
تصور بكَد ما غمرني
بضحكة عيوني الدمع ضعفين زاد
أحسب شكم ضحكة غنيناهة سكتة
وأحسب شكم "حصوة" بالشارع لكَيناهة محنة وقبلتها أجدامنة
الحزن جداً سريع
شكَد لعبنة
شكَد ركضنة
بكل درابين المحلة
بلا مبالاة بحجم حيل الطفولة وهم طلع كَدامنة
ها يكَلبي
طشرت حلمك ذبل لون الليالي؟
حط أديك أبين أدين
نصعد لوجه السمة نزرع شمس
الحزن صعبة يموت الموت للناس التحس
وأرد أعيش
شوية أعيش شوية وأتنفس حياة
الوكت ما تخلص صفنته
الوكت لو طالت صفنته نكَول مات
الوكت يمشي أعلة كَاع سنيني يزرع ذكريات
ودغدغت جرحي وضحك ضحكة سكارى
مسودنين هواي بس عدهم ضمير
ومو شرط بجيوبنا نزين فرحنا
واهس الفُقرة حلو بخبزة شعير
صغير اني جنت بس كلش فقير
صغير اني جنت..... بس كَلبي جبير
الله عليك يا مؤيد تاخذنى الى عالم جميل واتوه معك واضيع بين حيره العشق ووجع الكلمات وحنينك الى ماضى ..الله على قلبك الكبير ..كل عام وانت بالف خير ..لك محبتى وتوليباتى ..غاده
ردحذفكلماتكِ ألتي تغدق بالفراشات على ملامح قصائدي اليتيمة بالحزن
ردحذفتزدان بها حروفي فتجعلها أكثر شعراً وجمال.
كل عام وأنتِ الخير عزيزتي...
لكِ مني أحتراماً يفيض محبة ومودة