وينك أنتَ
أنت يا صوت المحبة الغاب من سنيني سكتة
وينك أنتَ
وجهك المعكوس فوكَـ الماي ببحور المحبة
أطركَـ بموج الفراكَـ وما عرفتة
وينك أنتَ
كَلبي يصرخ
روحي ترجف
مثل ليل بلايه سهرة
ريح بين أغصان شجرة
هموم تعزف
وينك أنتَ
الصوت ما يعبر حّدود شفافي بس بحلكَي صاح
ورد عليّ الصدى راح
ورد عليّ الصدى راح
يكَلي راح
ورد عليّ كَلبي بفشلتة مغطي وجهه
مسوي دمعاتة وشاح
ورد عليّ الليل جن غيمة جبيرة
تغطي شمس الله الجبيرة
وعلى رازونة فجرنة
الجفن مد أيدة يطلب خيط من نور الصباح
وردْ علية
وردْ علية
وردْ علية
وأنتَ مارديت ليش
وأنتَ تعرفني سنابل من يمر وكت الحصاد شلون أعيش
شلون أعيش
وأنة من أعشكَـ أعيش
وأحنة هسة بوكت صار الموت يمشي بكل رهاوة
ويدري بالوادم حطب وسنونة نار
الدنيا مو جي تبتسم معناها حلوة
الشوك هم مثل الوركَـ يحمل خظار
وانة أريد أعشكَـ وحّب
ودورت عن حب قديم وهاي صار سنين أدور
ضايع بحضن الدرب
ومن كثر ركض المشاعر يلهث لسان الكَلب
وصابرين
وصابرين
والصبر صاير ملح ونرش على جروح السنين
وبالجذب للناس أضحك
وأضحك وصوت الضحك يطلع حزين
وصابرين
والفقر شد راية سودة هناك فوكَـ سطوح أهلنة
وحنة كَد مافقرة صدكَـ
فوكَـ ماضينة عتكَنة
بس أكابر
وبقة صابر
ويبقة بزنودي الصبر يكَدر يشيل هموم باجر
ويبقة بضلوعي الحزن مرتاح يضحك
مثل دمعات الشهيد أطيح تظحك ع السواتر
الصوت بعدة يوزع الجلمات جن تسمع هلال
طير محبوس بسجن
الذكرى صارت تحفة منسية قديمة معلكَة برف الزمن
الروح شجرة
يضل جذرها يوصللها أجمل حياة وهوة بالكَاع أندفن
والدمع يرسم على خدودي أبتسامة
وبيها يتحدى الحزن
وبيها يتحدى
ا
ل
ح
ز
ن
احساس اكثر من رائع تخطه بحروف خرساء لتحولها الى لوحه تحكى عن حب والم ولقاء وفراق ..اتمنى ان اقرا لك دائما ....مبدع عزيزىلك محبتى وتوليباتى ..
ردحذفعزيزتي غادة..
ردحذفالأجمل من شعري أن هنالك من يقرأهُ بكل أحساس الزهور فيملأهُ عطراً وهو أنتِ.
لكِ ولأزهاركِ مني كل المحبة والأحترام